കൊച്ചി:
വിശുദ്ധ തോമ്മാശ്ലീഹാ ഇന്ത്യയിൽ വന്നു
എന്നതു ചരിത്ര സത്യവും സീറോ മലബാർ
സഭയുടെ ഔദ്യോഗിക നിലപാടുമാണെന്ന്
സീറോമലബാർ മേജർ ആർക്കി
എപ്പിസ്കോപ്പൽ കൂരിയ മെത്രാൻ മാർ
സെബാസ്റ്റ്യൻ വാണിയപ്പുരയ്ക്കൽ.
അദ്ദേഹത്തിന്‍റെ പ്രസ്താവനയുടെ
പൂർണരൂപം:വി. തോമ്മാശ്ലീഹാ ഇന്ത്യയിൽ വന്നതിന് തെളിവില്ല എന്ന് സീറോ മലബാർ സഭയുടെ മുൻ വക്താവ് പ്രസ്താവിച്ചതായി പത്രങ്ങളും ടെലിവിഷൻ ചാനലുകളും കഴിഞ്ഞ ദിവസം റിപ്പോർട്ട് ചെയ്യുകയുണ്ടായി. അത് സീറോ മലബാർ സഭയുടെ ഔദ്യോഗിക നിലപാട് തന്നെയാണെന്നും ചിലർ റിപ്പോർട്ട് ചെയ്തു. ഇത് വസ്തുതാവിരുദ്ധമാണ്. സീറോ മലബാർ സഭയുടെ ഔദ്യോഗിക നിലപാട് തോമ്മാശ്ലീഹാ ഇന്ത്യയിൽ വന്നു എന്നുതന്നെയാണ്.
അദ്ദേഹത്തിന്‍റെ സുവിശേഷ പ്രഘോഷണത്തിൽനിന്ന് ഉദ്ഭവിച്ചതാണ് സീറോ മലബാർ സഭ എന്നതും ഔദ്യോഗിക നിലപാടു തന്നെയാണ്. ലോകപ്രശസ്തരായ പല ചരിത്രകാരന്മാരും തോമ്മാശ്ലീഹായുടെ ഭാരത പ്രേഷിതത്വത്തെ വസ്തുതയായി സ്വീകരിച്ചിട്ടുള്ളതാണ്. പല ഗണത്തിൽപ്പെടുന്ന ചരിത്ര രേഖകളും അതിന് ഉപോൽബലകമായുണ്ട്. ചെറിയൊരു ഗണം ചരിത്രകാരന്മാർ ഇക്കാര്യത്തിൽ വിയോജിപ്പ് ഉള്ളവരും ഉണ്ടാകാം എന്ന വസ്തുതതയും അംഗീകരിക്കുന്നു. അതൊരു ന്യൂനപക്ഷം മാത്രമാണ്.
